إلى متى سيظل الإنسان فى مصر بلا قيمه شخص مثل عبد المنعم يخطف وهناك الكثيرين غير عبد المنعم مسألة التضامن مع عبد المنعم رغم إختلاف إنتماءاتنا الفكريه بل رغم تعارضها هوا تضامن مع الإنسان والذى له الحق أن يعتنق أى فكر يشاءه وله أن يختلف معى.
عرفت عبد المنعم فى سجن مزرعة طره كنت من المجموعه التى إعتقلت يوم 11 -5 - 2006 أثناء تضامننا مع القضاة أو بالأخص مع القضاء وقد كنا مجموعات مختلفة الإتجهات وكان العدد الأكثر من جماعة الإخوان وكنت أنا تجمع وهناك مجموعة ناصريين وعمل ومستقلين وأوتوبيس. المهم مكثنا أول الحبسه حوالى الأسبوع لا يفتح لنا باب الزنزانه وكان لا بد أن أن يأتى لنا بإحتياجاتنا من الكانتين أحد فكان عبد المنعم هناك منذ عدة شهور كان قدم يعنى وكان هوا إللى مسموح له يخرج يروح الكانتين فكان بيجمع البونات من الناس ويجيب لهم حاجاتهم دا إللى كنت أعرفه عنه وإللى كنت أعرفه كمان إن نظرة عنيه غريبه ومعتد بنفسه جداً ومغرور جداً وغاوى رسمه على الخلق وكمان كان بيبص لنا بصه غريبه لأننا مش إخوان بصه غريبه كأننا كائنات جايه من المريخ يمكن ده لأنه كان قاعد بقاله فتره فى السجن ومبيشفش غير الإخوان حواليه. أول موقف معاه لما طلبت إنه يجيب ليا سجاير من الكانتين وكانت الفاجعه وكأنى طلبت إنه يجيب لى إزازة ريد ليبل ومعاها مزه أنام معاها حاجه غريبه رد فعله وبعدها كأنه تحاشى الكلام معايا أنا والناس إللى مش إخوان وكمان بتشرب سجاير. مبحبش عبد المنعم لكن بتضامن معاه مع حريته مع الإنسان وحريته وبس
4 comments:
خلي الانطباعات الشخصيه جانباً ياريت تشيل مبحبش عشان دي تحمل امطباع شخصي مش المفروض ياعن يعني
انا لم اتفق مع فكره الاخواني ابداً ودائماً على خلاف معه ولاكنه انسان مصري حر معارض ( بعيداً عن انتمائه الاخواني )
مدونك جميله
مش هقول تحياتي وبتاع مبحبش الكلمه دي هههه
صباح الفل
على فكره يا صاحبى مبحبش دى أنا قاصدها قوى علشان أمرن نفسى على قبول الأخر والدفاع عن حقه حتى لو مختلف معاه
ومش هقولك نورت وبتاع وشكراً على الكلمتين الحلوين
مع إنك نورت المدونه فعلاً
صباح العسل
شكرأً ليك على التدوينة بس انا عندي سؤال هو انت عاشرت منعم علشان تعرف دي نظرات غريبة ولا هو خلقته كده؟!! وبعدين واحد كل اتصالك بيه ان اصحابك كانوا بيدوا له البونات يجيب لهم بيها طلبات من البوفيه . . منين حكمت انه مغرور وجداً كمان؟ ما هو لو مغرور من غير جداً حتى كان ايه اللي يخليه يعبر اي حد؟ متهيألي لازم تعيد نظر في موقفك ده
مش باطلب انك تحبه بس ما تحكمش على حد لم تتعامل معه عن قرب
وبعدين ليه انت ما تكونش محترم للآخر وعقليته
يعني اي طفل يساري - دول لو فيه اطفال يساريين - هايكون عنده من الوعي والإدراك ما يكفي انه يعرف ان الاسلاميين او المتدينيين او المشايخ او الناس بتوع جزاكم الله خيراً يا اخي ما بيشربوش سجاير لأنها حرام
وبالتالي ما كانتش حركة تنم عن حس مرهف ان واحد جاي يساعدك تقوم تطلب منه يشتري لك حاجة انت عارف انها تتعارض مع ما يعتقده
يا ريت تراجع نفسك بهدوء وساعتها هاتعرف انك بتتكلم عن انسان فعلاً متربي جداً واخلاقه عالية جداً جداً
ملحوظة: انا ما علقتش على صفة انه معتد بنفسه لأن ده شيء جيد وباشكرك عليه حتى لو انت شايف ان الاعتداد بالنفس ده شيء سيء
يا أستاذ كواكبى حاجه غريبه قوى يا سيدى أنا كاتب البوست بالإسلوب ده لتوصيل معنى معين وواضح معنى حرية الإنسان حتى لو أنا مبحبهوش
وبعدين أنا قلت مبحبش عبد المنعم مقولتش بكرهه
وبعدين أنا حاطط إنطباعى الشخصى جداً عن عبد المنعم لأن دى مدونه شخصيه وأظن ده واضح
وعلى فكره إحنا مسلمين على بعض أنا وهوا فى منتدى القاهره عادى يعنى مش علشان أنا يسارى وهوا إخوان يبقى نقابل بعض نلطش لبعض ونغرف بعض
فيه إيه يا عم
إنتا مفهمتش البوست ولا إيه
نورت وشرفت
Post a Comment